C朗梅開二度　女友比堅尼贈興

[img]http://static.apple.nextmedia.com/images/apple-photos/video/20130723/org/1374523872_3631.jpg[/img]

基斯坦奴朗拿度（C朗）終於重返英格蘭球壇！係就係，不過只係佢喺周日隨皇家馬德里去英國進行第一場季前熱身賽啫。C朗經過唞暑之後表現仲生猛，踢半場梅開二度幫皇馬以6:0大勝般尼茅夫。C朗要開工，佢女友就去咗美國邁阿密享受陽光海灘，大騷火辣身材，兩口子一樣咁hot。

皇馬大軍喺周日飛抵英國，當晚就即刻進行作客般尼茅夫嘅熱身賽。般尼茅夫咁好彩搵到皇馬做熱身賽對手，球會都乘機將呢場波票價訂為60鎊（約700港元），遠比之前一場熱身賽3至8鎊高。般尼茅夫喺新球季升上英冠，球會以最高紀錄收購前鋒馬特杜比斯身價都只係80萬鎊，係C朗由曼聯轉投皇馬筆轉會費嘅1%。

[b]入兩粒助皇馬炒英冠隊[/b]
呢場波亦係皇馬新帥安察洛堤首場領軍嘅賽事，仲有佢副手施丹喺場邊幫手督師。正選上陣嘅C朗喺22分鐘主射罰球先開紀錄，佢喺41分鐘再個人表演推過埋對手門將射入空門，踢咗半場就退下火線。至於皇馬今夏嘅新兵都有喺場波上陣，正選披甲嘅艾斯高表現仲相當唔錯。
今夏轉會市場風頭躉之一嘅希古恩亦有亮相，喺下半場入替之後即刻建功，接應艾華路莫拉達直傳單刀射入。之前傳希古恩幾乎肯定會過檔阿仙奴，日前又傳拿玻里已經開價3,700萬歐元斟介，不過據講要達成個人條件協議仲有一定困難，安察洛堤賽後亦都話皇馬冇強制性一定要放走希古恩：「希古恩𠵱家仍然係皇馬球員，今仗一上陣就入波，而我亦唔太清楚有關拿玻里開價買佢嘅報道。」講到C朗，肥安唔放人嘅意向就更加明確：「C朗係皇馬最重要嘅球員，第一巨星，佢係皇馬嘅未來，呢一點毋庸置疑。」西班牙傳媒傳皇馬開出年薪1,250萬歐元新約，希望同C朗續約到2018年。皇馬下一場熱身賽，會飛到法國喺周三友賽里昂。

[b]艾琳娜性感濕身[/b]
C朗忙於備戰新球季，佢女友艾琳娜就得閒可以遊山玩水。艾琳娜俾人拍到喺邁阿密同個男性朋友一齊去游水曬太陽，着三點式嘅佢，仲一啲都冇吝嗇到佢嘅美好身材。

[img]http://static.apple.nextmedia.com/images/apple-photos/apple/20130723/large/img0000012_aa05.gif[/img]
C朗在熱身賽梅開二度，女友艾琳娜在邁阿密大騷火辣身材，二人場內場外火辣辣。設計圖片



來源:蘋果日報網站