赴德險空難　紅魔驚餐死

真係嚇死我求大俠囉，曼聯差啲又喺德國發生空難！紅魔星期二搭飛機抵達德國，喺就降落時，先發覺跑道仲有另一架飛機，機師即刻揸番架機上天空，先唔使撞機！我求大俠覺得好在費格遜退咗休啫，否則真係嚇死佢老人家嘞！
為備戰周三對利華古遜嘅歐聯賽事，曼聯全隊周二啟程，搭上有185個座位嘅英國君主航空321客機去德國，原定喺當地時間下晝5點幾到達科隆機場。曼聯呢次嘅大軍名單有朗尼、迪基亞、里奧費迪南、傑斯、香川真司同贊奴沙等球星，而尹佩斯同尼曼查維迪有傷，同停賽嘅費蘭尼一齊唔喺名單當中。

[b]降落時跑道竟有飛機[/b]
當地時間5點半左右，飛機靠近科隆機場逐步下降，就喺離地仲有400米時，機師竟然發覺跑道上仲有架飛機，如果繼續降落的話，肯定撞機！機師立即改變方向，全力向上飛。由急降變急升，我求大俠都幻想到入面嘅乘客係幾咁驚慌，就好似玩過山車一樣。有曼聯內部人士向《曼徹斯特晚報》透露當時情況，「當時真係好恐怖！我哋明明就嚟降落，但架機突然升返上去，聽聞因為跑道仲有其他飛機。機長有透過廣播道歉，之後安全着陸。」
架機喺上空兜咗10分鐘，喺5點40分左右平安降落。落機後，嚇到鼻哥窿都冇肉嘅里奧費迪南就喺twitter報平安，「終於喺德國着陸，我都係啱啱先定神。」睇到呢單新聞，我求大俠都諗起1958年嘅慕尼黑空難，共有8名曼聯球員喪生，天才橫溢嘅鄧肯愛華士傷重逝世。好彩今次只係九霄驚魂，最後飛機都平安着陸，冇重演當年嘅空難，否則損失咁大批好球員，無論對曼聯或全個球壇，都係極大嘅悲劇。
另外，前曼聯助教菲倫話自己係過去5年紅魔嘅實際主帥，只係差個名；我求大俠覺得佢想搵工，所以搵機會sell吓自己啫。

[img]http://static.apple.nextmedia.com/images/apple-photos/apple/20131128/large/img0000012_aa05.gif[/img]


來源:蘋果日報網站