屯門愉園大反擊

涉嫌打假波嘅屯門同愉園，俾足總禁止參加今季餘下賽事，件事仲有下文，事關呢兩支甲組隊都認為判決唔合理，密謀上訴大反擊！
足總前日召開特別董事會，接納專責委員會意見，認為愉園同屯門未能喺管治及財政能力穩定性作出保證，又話兩隊嘅操守損害咗本地波聲譽，所以齊齊要暫停參賽。對於足總嘅判決，愉園體育會主席貝鈞奇感到詫異，仲同佢哋嘅執委會、贊助商代表同副領隊盧冠銘，噚日一早就開咗兩個鐘頭會議，研究吓點樣上訴。

[img]http://static.apple.nextmedia.com/images/apple-photos/apple/20140213/small/13s5-095p.jpg[/img]
■愉園前鋒李靈峰（右）如常出戰預備組賽事。鄧永賢攝

貝鈞奇轟足總冇準則
雖然貝生同時兼任足總副主席，但佢對足總嘅判決就有疑問︰「足總要求愉園交出財政狀况同管理證明後，我哋已經委託律師掌管剩番嘅200萬（港元）班費；話管理唔達專業水平，亦冇詳列有乜準則；至於損害聲譽方面，廉政公署至今都仲調查緊，足總呢個指控，未免太過嚴重。再講，今次事件會引發好多問題，好似贊助商同球員去留等。」貝生話整理好所有資料後，今個禮拜內會向足總上訴。會方強調足總今次未審先判，就算足總唔畀上訴，唔排除會向國際體育仲裁法庭上訴；而愉園噚晚喺石硤尾球場對東方嘅預備組賽事，球員仲掛上「足總霸道，妄顧球員生計」嘅橫額，以示不滿。
至於屯門署理教練潘文俊亦透露，會方傾向上訴︰「球隊有足夠資金應付下半季，同時亦有足夠球員，加上一直有維持練波，唔覺得實力有影響。管理方面，足總冇詳細講有乜要求，𠵱家有事就話我哋唔得，咁季前又有冇審查過其他球隊呢？」


酌情處理轉會安排
足總CEO薛基輔重申，呢個係董事局最後決定，不設上訴；但明白今次事件會令好多球員失業，已知會亞洲足協酌情處理轉會窗已關嘅問題，畀受影響球員可以繼續轉會。為咗處理今次事件，佢亦取消原定噚日出發去南韓、向當地足總取經之旅，留港研究兩隊禁賽後，聯賽重新計分、賽程編排等安排，今日會再發聲明向大家交代。
至於有指公民來季或散班，貝生回應話，公民體育會係非牟利機構，如果參加下季港職聯，就先要喺今夏嘅ほ人大會修章，「到時足總唔畀我哋參加，至多轉戰其他組別聯賽，但就唔係散班。」

[img]http://static.apple.nextmedia.com/images/apple-photos/apple/20140213/large/13s5-096p.jpg[/img]
■愉園球員喺噚晚對東方嘅預備組賽事，掛上「足總霸道，妄顧球員生計」橫額表達不滿。

來源:蘋果日報網站