裁判需與時並進

上季玩完馬後炮，今季就做預言家，同大家一齊睇吓嚟緊周末有咩好睇。今周傾咩：英超執法需要科技協助？

90分鐘內要跑，又要金睛火眼，仲要喺極短時間內造出判斷，其實球證都幾辛苦。球證誤判成日都有，好多時誤判嘅成因並唔係球證唔熟球例，而係佢哋睇漏眼或者睇錯，所以先喺電光火石間做錯決定。
由旁證，到第4裁判，再到底線球證，足球嘅裁判越來越多，就係因為一個人做唔晒，所以要搵多幾個人幫眼。人多係有幫忙，6個人一齊去打仗，肯定好打過1個人。呢個係好正常嘅想法，但亦都係小學雞嘅邏輯。增加人手係有用，但效率可以提高幾多呢？例如一支500人嘅軍隊，你覺得以下邊個方法可以最有效增加軍隊嘅戰鬥力？加多500個大隻佬入去，定係每人配支機關槍呢？
人類一直用科技去令我哋更有效率咁達到目的，完成工作。但喺足球裁判嘅範疇，永遠都用最落後嘅方式，就係不斷增加人手，而對科技置之不理。鷹眼嘅技術喺網球實行多年，但作為全球最受歡迎嘅運動，足球拖到近兩年先逐步普及。
小弟最憎嘅係，有人話誤判都係足球嘅一部份，仲將呢個視為理所當然！既然制定咗球例，目標梗係盡全力執行所有球例。足協嘅工作係要推動足球進步，搵方法保證所有球例妥善執行，而唔係明知有方法解決誤判問題，卻視而不見。由足協、球會、球證、教練、球員以至做足球新聞嘅，都需要緊貼科技嘅步伐。小弟認為，現階段可以先推行球證翻睇慢鏡嘅措施，當球證遇到懷疑時可以睇慢鏡。

[img]http://static.apple.nextmedia.com/images/apple-photos/apple/20140328/large/aa0703a.jpg[/img]
■今季英超誤判頻頻。資料圖片


來源:蘋果日報網站